ترجمه و چاپ مانیفست مکتب ادبی دارکولییسم توسط روزنامه وشه ( زبان اثر: کردی)، اربیل -عراق

محمد رضا نظری دارکولی بنیانگذار مکتب ادبی دارکولییسم، دارکولییسم
IMG 20180808 WA0001 e1533766453949 - ترجمه و چاپ مانیفست مکتب ادبی دارکولییسم توسط روزنامه وشه ( زبان اثر: کردی)، اربیل -عراق
هه‌میشه‌ ئاواتی من ئه‌وه‌ بووه‌ دنیا دوور بێ له‌ شه‌ڕ و زۆرداری. هه‌موو به‌ کۆمه‌ڵ بژین و هۆگری دووره‌په‌رێزی نه‌بین. هه‌ر به‌و ئومێده‌ش رۆمانی “مه‌رگی دراوسێ”م نووسی و بناغه‌ی ئه‌ده‌بی دارکولییسمیم داڕشت، لێره‌دا به‌ دڵ ده‌خوازم نووسه‌رانی دنیا به‌ گشتی تێکه‌ڵ به‌م جووڵانه‌وه‌یه‌ ببن و قه‌ڵه‌می خۆیان له‌و بواره‌دا وه‌گه‌ڕ بخه‌ن. له‌و په‌یماننامه‌یه‌دا هاوبه‌ش بن و ئه‌و رێچکه‌یه‌ بگرنه‌به‌ر، چونکه‌ ئه‌ده‌بیات پێویستی به‌ په‌یماننامه‌یه‌کی ئاوا هه‌یه‌.
ده‌ستوور:
په‌یماننامه‌ی جووڵانه‌وه‌ی ئه‌ده‌بی دارکولییسم بریتییه‌ له‌و ۱۰ بڕگه‌یه‌ی خواره‌وه‌.
۱-داواکاری بۆ به‌ هێزکردن و په‌ره‌پێدانی دۆستایه‌تی له‌ نێوان مرۆڤدا، خۆشه‌ویستی مرۆڤ و گیانداران و سروشت.
جووڵانه‌وه‌ی ئه‌ده‌بی دارکولی به‌هێزکردن و په‌ره‌پێدانی ئاشتی دنیا به‌ گرنگترین ئامانجی خۆی ده‌زانێ. هه‌روه‌ها بارودۆخی هه‌نووکه‌یی دنیا ئاڵۆز و مه‌ترسیدار هه‌ڵده‌سه‌نگێنێ.
بۆ هه‌موو که‌س ئاشکرایه‌ گه‌وره‌ترین ته‌نگژه‌ی مرۆیی ئه‌مڕۆ دووره‌په‌رێزییه‌. ئه‌وه‌ش به‌هۆی دابڕان له‌ دڵۆڤانی و خۆشه‌ویستییه‌وه‌ دێته‌ ئاراوه‌. دنیای ئه‌مڕۆ، بێحورمه‌تی و له‌ دژیه‌ک راچوون. خۆخۆری و عه‌شیره‌تگه‌رایی. نایاسایی و تاکره‌وی. شه‌ڕ وه‌ختێ بێ مانا ده‌بێ ئه‌گه‌ر که‌سێک که‌سێکی تر بریندار بکات یان به‌ هۆی شه‌ڕ له‌ نێوان دوو که‌س و گرووپێک خوێنرشتن بێته‌ ئاراوه‌، ته‌نانه‌ت خۆپه‌رستیش به‌شێکه‌ له‌ به‌شه‌ڕهاتن له‌گه‌ڵ ئه‌موئه‌ودا، راستییه‌که‌ی ته‌واوی شه‌ڕه‌ گه‌وره‌کان له‌ خۆپه‌رستییه‌وه‌ سه‌رچاوه‌ ده‌گرن.
جووڵانه‌وه‌ی ئه‌ده‌بی دارکولی دنیایه‌کی دوور له‌ شه‌ڕ و خوێنرێژی ده‌وێ، واته‌ دنیایه‌ک خۆپه‌رستی تێدا نه‌بێ. خۆدوور نه‌خستنه‌وه‌ و یه‌کترکوژی تێدا نه‌بێ. له‌ هه‌مبه‌ر ئه‌وانه‌دا دنیا پڕبێ له‌ خۆشه‌ویستی و یه‌کتر خۆشویستن و ده‌ستی برایه‌تی بۆ یه‌کتر درێژکردن. نووسه‌رانی ئه‌ده‌بی دارکولی بۆ په‌ره‌پێدانی ئاشته‌وایی له‌ دنیادا ده‌نووسن، بێزارن، ئاژاوه‌ و شه‌ڕ و کوشتن، مه‌حکووم ده‌که‌ن و به‌ نووسینه‌کانی خۆیان هه‌وڵ ده‌ده‌ن له‌سه‌ر هزر و ئاکاری خه‌ڵکی دنیا کاردانه‌وه‌یان هه‌بێ، تا ئه‌و جێیه‌ی خۆشه‌ویستی و ئاشتی دنیا په‌ره‌ بسێنێ. جووڵانه‌وه‌که‌ به‌ گشتی خه‌سار گه‌یاندن به‌ مرۆڤ، سروشت و باقی گیاندارانی کێوی، دوور له‌ پاک ره‌وشتی و پێچه‌وانه‌ی ویستی ئه‌و ده‌ژمێرێ. هه‌ر به‌م هۆیه‌وه‌ نووسه‌رانی ئه‌و جووڵانه‌وه‌یه‌ له‌ نووسینی خۆیاندا، خۆشه‌ویستی مرۆڤ له‌گه‌ڵ گیانداران و سروشت په‌ره‌ پێ ده‌ده‌ن و بانگه‌وازی ئاشته‌وایی بۆ ده‌که‌ن.
۲-دنیا به‌ ماڵی خۆمان بزانین:
نووسه‌رانی جووڵانه‌وه‌ی ئه‌ده‌بی دارکولی له‌ هه‌ر شوێنێکی ئه‌م دنیایه‌ بن خۆیان به‌ به‌شێک له‌ جیۆگرافیای تاییبه‌ت به‌م دنیایه‌ نابه‌ستنه‌وه‌ و سه‌رله‌به‌ری ئه‌م دنیایه‌ به‌ ماڵ و زێدی خۆیان ده‌زانن. چوارقوڕنه‌ی ئه‌م دنیایه‌ به‌ یه‌ک چاو ته‌ماشا ده‌که‌ن و له‌ دڵه‌وه‌ خۆشیان ده‌وێ. له‌ نووسراوی خۆیاندا له‌باره‌ی هه‌ر لایه‌کی ئه‌م دنیایه‌ ئه‌گه‌ر به‌پێویستی بزانن وه‌ده‌نگ دێن. زمانی خۆیان به‌ به‌رپرس ده‌زانن هاوار و بانگه‌وازی خه‌ڵکی دنیا بڵاو بکه‌نه‌وه‌.
۳-دژ به‌ ره‌گه‌زپه‌رستی و ده‌مارگرژی ئاینی:
جووڵانه‌وه‌ی ئه‌ده‌بی دارکولی، به‌ گشتی بیری ره‌گه‌زپه‌رستی و ده‌مارگرژی مه‌ترسیداری ئاینی به‌ ناپه‌سند ده‌زانێ و له‌ نرخ و بایه‌خی مرۆڤایه‌تی که‌م ده‌کاته‌وه‌. جووڵانه‌وه‌ی ئه‌ده‌بی دارکولی، ته‌واوی خه‌ڵکی دنیا، به‌ هه‌موو ڕه‌نگێکه‌وه‌، ره‌گه‌ز، بارودۆخ و ئاینی جیاواز، له‌گه‌ڵ یه‌کتر یه‌کسان و به‌ چاوێک سه‌یریان ده‌کات و رێز بۆ هه‌موویان داده‌نێ. نووسه‌رانی ئه‌م جووڵانه‌وه‌یه‌ له‌ به‌رهه‌می خۆیاندا ره‌گه‌زپه‌رستی ره‌ت ده‌که‌نه‌وه‌ و به‌ دوور له‌ ئاکاری مرۆیی ده‌ژمێرن. هاوکات هه‌وڵ ده‌دا هه‌موو لایه‌ک وریا بکاته‌وه‌ هه‌ر چه‌شنه‌ ده‌مارگرژی ئاینی که‌ ده‌بێته‌ هۆی پێکهه‌ڵپڕژان له‌ نێوان دوو ده‌سته‌دا، یان دووری کردن ده‌سته‌یه‌کی زۆریش بچووک له‌ خه‌ڵکی دنیا، دوور له‌ پاکڕه‌وشتی و به‌ نامرۆڤانه‌ی ده‌زانێ.
۴- دانه‌بڕان له‌ ویژدان:
جووڵانه‌وه‌ی ئه‌ده‌بی دارکولی باوه‌ڕی وایه‌، ویژدان ته‌نیا ده‌سه‌ڵاتێکه‌ پێویستی به‌ دادوه‌ر نییه‌, بۆیه‌ به‌ ته‌رازووی ویژدان ئاکاری شیاو و نه‌شیاو هه‌ڵده‌سه‌نگێنێ. نووسه‌رانی دارکولیستی نابێ به‌ هیچ شێوه‌یه‌ک به‌ پێوه‌ری ئه‌موئه‌و وه‌ختێ له‌ نێوان زۆربه‌ی خه‌ڵکدا لێکترازان دێنێته‌ ئاراوه‌، بۆ وێنه‌ شێوازه‌کان، ئاین، فه‌لسه‌فه‌ و نه‌ریتی تایبه‌ت به‌ هۆزه‌کان، لێکۆڵینه‌وه‌ له‌سه‌ر کێشه‌ ئاڵۆزه‌کانی خه‌ڵک بکه‌ن و به‌ که‌ڵکوه‌رگرتن له‌وان بیروباوه‌ڕی خۆیان بچه‌سپێنن. ئێمه‌ بڕوامان وایه‌ ویژدان ده‌توانێ باشترین زه‌ڕه‌بین بێت بۆ جیاکردنه‌وه‌ی باش له‌ خراپه‌کان.
۵-  ئازادی بیروڕا ده‌ربڕین:
نووسه‌رانی دارکولییستی، ئازادی قه‌ڵه‌م به‌ مافی خۆیان ده‌زانن و به‌ هاسانی و به‌بێ جیاوازی له‌باره‌ی که‌سه‌کان، حکوومه‌ت، ئاین، بیروڕا، هۆگری و داونه‌ریتی مه‌زنی خه‌ڵکی دنیا ده‌نووسن.
له‌ بواری ده‌ربڕینی راستییه‌کان له‌ هیچ له‌مپه‌ر و به‌رهه‌ڵستێکی دژ ناپرینگێته‌وه‌ و نووسه‌رانی دارکولیستی به‌ ئاشکرا نووسراوی خۆیان له‌سه‌ر پاکه‌تی پۆسته‌ و ناوی که‌سایه‌تی به‌ناوبانگی دنیا له‌ کتێبه‌کانیاندا دێنن.
جووڵانه‌وه‌ی ئه‌ده‌بی دارکولی له‌ ده‌ربڕینی هه‌موو بابه‌تێک به‌و مه‌رجه‌ی تایبه‌ت بێ به‌ په‌ره‌سه‌ندنی ئاشتی جیهانی و وه‌رگرتنه‌وه‌ی مافی ژێرپێخراوی خه‌ڵکی سته‌ملێکراوی دنیا له‌ ده‌سته‌ی سته‌م و زۆرداران، یارمه‌تی ده‌دات و خۆنابوێرێ و ده‌ستی ئاواڵایه‌.
۶- ئازادی به‌کارهێنانی مێتۆد و شێوازه‌کانی نووسین:
جووڵانه‌وه‌ی ئه‌ده‌بی دارکولی به‌ ئامانجی په‌ره‌سه‌ندنی یه‌کترویستی، دلۆڤانی، له‌خۆبوردوویی، یه‌کسانخوازی، دنیا به‌ ماڵی خۆزانین، ئازادی بیر و ڕاده‌ربڕین و رووڕاستی، له‌ناو خه‌ڵکی دنیادا هاتووه‌ته‌ ئاراوه‌، ئه‌و جووڵانه‌وه‌یه‌ بۆ شوێندۆزی و بۆ تێڕامانی دنیابینی نووسه‌ران له‌ ده‌ستنیشانکردنی په‌یام و ناوه‌ڕۆک هزری ئه‌وان کار ده‌کات، بۆیه‌ نووسه‌رانی جووڵانه‌وه‌که‌ له‌ به‌کارهێنانی مێتۆد و شێوازی نووسینی رابردوو، ئێسته‌ و داهاتوودا ئازادن. بۆ وێنه‌، ئه‌و نووسه‌رانه‌ی به‌ شێوه‌ی شه‌پۆلانی زه‌ین یان سووریال و هه‌ر جۆرێکی ئه‌ده‌بی تر ده‌نووسن، ده‌توانن به‌ قبووڵکردنی په‌یماننامه‌ی جووڵانه‌وه‌ی ئه‌ده‌بی دارکولی، رێچکه‌ی نووسینی خۆیان بخه‌نه‌ خزمه‌تی ئه‌و په‌یماننامه‌یه‌وه‌. هه‌روه‌ها ئه‌م جووڵانه‌وه‌یه‌ له‌ سه‌رله‌به‌ری شێواز و رێوشوێنی نووسینی رابردوو، ئێسته‌ و داهاتوو که‌ڵک وه‌رده‌گرن و په‌یماننامه‌ی ئه‌و جووڵانه‌وه‌یه‌ ته‌نیا تایبه‌ته‌ به‌ بابه‌ت و په‌یامی کتێبه‌کان.
۷- ره‌خنه‌گرتنی بوێرانه‌:
نووسه‌رانی دارکولیستی له‌ به‌رانبه‌ر ره‌خنه‌دا دڵفراوانن، یه‌کێک له‌ رێبازه‌کانی تایبه‌تی جووڵانه‌وی ئه‌ده‌بی دارکولی له‌ ره‌خنه‌ی کرداری ناڕه‌وای مرۆڤ، ئه‌وه‌یه‌ که‌ راسته‌وخۆ ناوی که‌سه‌کان له‌ کتێبه‌کاندا ده‌نووسێ و به‌ وریایییه‌وه‌، له‌ کاتی ره‌خنه‌گرتن له‌وان، جنێویان پێ ده‌دا. نووسه‌رانی ئه‌ده‌بی دارکولی له‌ وه‌ختی ره‌خنه‌گرتن له‌ نابار، ئازادن جنێویان پێ بده‌ن. ئێمه‌ بۆ پشتیوانی له‌ راستی، یه‌کسانی و مافی مرۆڤ، زمانی زبر ده‌خه‌ینه‌ کار، چونکه‌ ده‌مانه‌وێ دیکتاتۆر و تاوانکارانی گه‌وره‌، به‌هۆی ئه‌وه‌ی خاوه‌نی هێز و ده‌سه‌ڵات و بانگه‌شه‌ن، رووخسار و ده‌مامکی بێ ئازاری له‌ خۆیان نیشان ده‌ده‌ن و ئه‌و خه‌ڵکه‌ی کوێرانه‌ هه‌ڵده‌فریوێن، ئه‌و خه‌ڵکه‌ی کوێرانه‌ فریویان خواردووه‌، به‌ سانایی نووسینی کتێبێک ده‌خه‌ینه‌ به‌ر تیغی ره‌خنه‌ و تڕۆیان ده‌که‌ین.
نووسه‌رانی ئه‌ده‌بی دارکولی له‌سه‌ر ئه‌و باوه‌ڕه‌ن ئه‌ده‌بیات ده‌بێ به‌بێ ترس قسه‌ بکات. له‌ رۆمانی “مه‌رگی دراوسێ”دا که‌ ده‌سپێکی جووڵانه‌وه‌ی ئه‌ده‌بی دارکولییه‌، ده‌توانی بڕگه‌کانی په‌یماننامه‌ی جووڵانه‌وه‌ی ئه‌ده‌بی دارکولی به‌ به‌ڕێوه‌براوی ببینی. له‌و رۆمانه‌دا «هێری ترۆمێن» سه‌رۆک کۆماری ئه‌وسای ئه‌مه‌ریکا، وه‌ختێ ئه‌و وڵاته‌ هێرشی ئه‌تۆمی کرده‌ سه‌ر ژاپۆن، ره‌خنه‌ی لێ گیرا. له‌ به‌شێکی رۆمانه‌که‌دا ده‌بینی: سیاسه‌ت چه‌نده‌ پیسه‌! سه‌رۆک کۆماری میله‌تێک له‌ کاتێکدا نیوه‌ی هۆشی لای ماڵێیه‌ بچێته‌وه‌ سمت و ساتی ژنه‌که‌ی له‌ باوه‌ش بگرێ، فه‌رمانی شه‌ڕێک ده‌رده‌کات، هه‌ر به‌ بای خه‌یاڵیدا نایه‌ت چه‌نده‌ خه‌ڵکی بێتاوان ده‌کوژرێن. دوای ده‌رچوونی ئه‌و فه‌رمانه‌، فه‌رمانده‌رانی شه‌ڕ به‌بێ راوه‌ستان فه‌رمان جێبه‌جێ ده‌که‌ن، به‌بێ ئه‌وه‌ی بیر له‌ ئاکامی ئه‌و شه‌ڕه‌ بکه‌نه‌وه‌، یان ئه‌گه‌ر ئاگاداریشیان هه‌بێ به‌بێ گوێدان، ئه‌و ده‌ستووره‌ به‌ڕێوه‌ ده‌به‌ن.
(رۆمانی مه‌رگی دراوسێ، محه‌مه‌د ره‌زا نه‌زه‌ری دارکولی. نشر کتاب لۆس ئه‌نجلۆس ۲۰۱۴)
۸- له‌ خۆبوردوویی:
 جووڵانه‌وه‌ی ئه‌ده‌بی دارکولی باوه‌ڕی وایه‌ رازی په‌ره‌پێدان و به‌رده‌وامی دۆستایه‌تی سه‌رچاوه‌ی له‌ دڵفراوانی و له‌ خۆبوردووییدایه‌. چونکه‌ کولتووره‌کان، باوه‌ڕ، به‌رچاوو رووبه‌ری بیر و هزری خه‌ڵک جیاوازن. لێره‌وه‌ گرنگه‌ بۆ پێوه‌ندی سه‌قامگیری دۆستایه‌تی فێری له‌ خۆبوردوویی بین. نووسه‌رانی جووڵانه‌وه‌ی ئه‌ده‌بی دارکولی له‌ خۆبۆردوویی به‌ هه‌ند ده‌گرن و ده‌زانن له‌ نووسراوه‌ و به‌رهه‌می خۆیاندا به‌ گرنگی بینوێنن.
۹-رووڕاستی:
زه‌رده‌شت، په‌یامهێنه‌ری ئێرانیان فه‌رموویه‌تی: رێ له‌ دنیادا یه‌کێکه‌ و ئه‌و رێیه‌ش راستییه‌.
جووڵانه‌وه‌ی ئه‌ده‌بی دارکولی هۆی شه‌ڕه‌کان، تاوان، ملهوڕی و نایه‌کسانی له‌ دنیادا به‌ پشتکردن له‌ راستی، ده‌زانێ، به‌و مه‌رجه‌ی خه‌ڵک به‌ رووڕاستی یه‌کتر بدوێنن، به‌بێ هیچ گرفتێک کۆمه‌ڵگا به‌ره‌و حه‌ساوه‌یی ده‌چێت. به‌داخه‌وه‌ خه‌ڵکی ئه‌م دنیایه‌ له‌ راستی دوور که‌وتوونه‌ته‌وه‌. ئێمه‌ ته‌نیا رێی حه‌سانه‌وه‌ی دنیا له‌ راستیدا ده‌بینین و سه‌رله‌به‌ری رێیه‌کان دوور له‌ راستی به‌ هه‌ڵه‌ و چه‌واشه‌ ده‌زانین. بۆیه‌ نووسه‌رانی ئه‌و جووڵانه‌وه‌یه‌ له‌ نووسراوی خۆیاندا راستییه‌ به‌ر پێواره‌کان به‌وپه‌ڕی ئازایه‌تییه‌وه‌ ده‌رده‌بڕن و بانگه‌واز بۆ گرنگی ئه‌وپه‌ڕی راستی ده‌که‌ن.
شیاوی باسه‌ له‌و په‌یماننامه‌یه‌دا، مه‌به‌ست له‌ راستی گرنگ، ریالیسم نووسین نییه‌، به‌ڵکو نووسه‌ران ده‌توانن له‌ چوارچێوه‌ی چیرۆکی سووریالیستی، سه‌مبولیستی و یان ریالیسمی جادوویش به‌ راستی بنووسن و بانگه‌واز بکه‌ن.
۱۰-یه‌کسانی مرۆڤ:
جووڵانه‌وه‌ی ئه‌ده‌بی دارکولی مرۆڤ به‌ گشتی له‌ بواری مافی ژیاندا له‌گه‌ڵ یه‌ک به‌ یه‌کسانی ده‌بینێ. هه‌روه‌ها له‌ حه‌ژمه‌ت بارودۆخی ناله‌باری خه‌ڵکی هه‌ژاری دنیا، وه‌زاڵه‌ هاتووه‌. بۆ ده‌بێ له‌ وڵاتگه‌لێک خۆشبژێوی زۆر و زه‌وه‌ند بێت، له‌ حاڵێکدا له‌ رۆژدا هه‌زاران نفووس له‌ خه‌ڵکی دنیا له‌ برسان ده‌مرن؟ جووڵانه‌وه‌ی ئه‌ده‌بی دارکولی راپه‌ڕیوه‌ و ده‌یه‌وێ پشتیوانی له‌ خه‌ڵکی هه‌ژار و بێ به‌شه‌کان بکات. ده‌بێ دنیا به‌ره‌و هاوسه‌نگی بچێت! نووسه‌رانی دارکولیستی بۆ پشتیوانی له‌ مافی یه‌کسانی و مرۆیی، خه‌ڵکی بێبه‌شی دنیا چیرۆک و رۆمان ده‌نووسێ و ژیانی دڵته‌زێنی ئه‌وان ده‌خاته‌ روو، تا دنیاخۆران سه‌ری شه‌رمه‌زاری به‌ر بده‌نه‌وه‌ و وه‌بیریان بێته‌وه‌ سه‌رله‌به‌ری خه‌ڵکی دنیا له‌گه‌ڵ یه‌کتر یه‌کسانن و پاژی بنه‌ماڵه‌یه‌کن. ئه‌و که‌سانه‌ی نازانن ده‌بێ فێریان بکه‌ین. ته‌واوی ئه‌و خه‌ڵکه‌ حه‌قیان به‌سه‌ر یه‌کتره‌وه‌ هه‌یه‌.
جووڵانه‌وه‌ی ئه‌ده‌بی دارکولی ده‌یه‌وێ شیعره‌ به‌ناوبانگه‌که‌ی سه‌عدی شیرازی به‌ گوێی دنیا بگه‌یه‌نێ که‌ ده‌ڵێ:
تۆره‌مه‌ی ئاده‌می له‌ یه‌ک له‌شولارن
له‌ گه‌وهه‌رێکن کری کردگارن
ئه‌گه‌ر به‌شێکی ئازار ببینێ
بۆ هیچ به‌شێکی ئارام نامێنێ
وه‌ختێ به‌ خه‌می که‌سێک نه‌زانی
زۆر حه‌یفه‌ ئه‌گه‌ر بڵێن ئینسانی.
وه‌بیرهێنانه‌وه‌:
په‌یماننامه‌ی جووڵانه‌وه‌ی ئه‌ده‌بی دارکولی له‌و ۱۰ خاڵه‌ی سه‌ره‌وه‌دا، رۆمانی مه‌رگی دراوسێ، بۆ به‌فه‌رمیکردنی ئه‌و په‌یماننامه‌یه‌، بۆ نووسه‌ران و ره‌خنه‌گرانی ئه‌ده‌بیم نووسیوه‌ و ۱۰ بڕگه‌ی په‌یماننامه‌که‌ له‌ودا له‌به‌رچاو گیراوه‌ و راستییه‌که‌ی ئه‌و رۆمانه‌ سه‌ره‌تایه‌که‌ بۆ جووڵانه‌وه‌ی ئه‌ده‌بی دارکولی.
ئه‌و رۆمانه‌ له‌لایه‌ن بڵاڤۆکی شه‌ریکه‌ی کتێبی لۆس ئه‌نجلۆس چاپ و بڵاو کراوه‌ته‌وه‌.
به‌ ئومێدی ئاسووده‌یی و ئاشتی و سه‌قامگیری بۆ خه‌ڵکی دنیا.
محه‌مه‌د ره‌زا نه‌زه‌ری دارکولی
ئێران- تاران- به‌هاری ۲۰۱۵.
وه‌ڕگێڕانی: سه‌ڵاح نیساری

وشە – تایبه‌ت

AM:09:55:17/04/2018

لینک خبر: روزنامه خبری وشه